11/5/2008 巨龜莊自助早餐 --> 人蔘專賣廳 --> 韓流冬蟲夏草護肝寶專門店 --> 韓國化妝品專門店 --> 青瓦台總統府門外參觀 --> 午餐 (秘製燒烤豬肉) --> 明洞 --> 南大門 --> 仁寺洞 --> SSAMZIEGIL--> 晚餐 (硫磺鴨豪華餐) --> 回酒店

9.30am 今早出門口前飲左半支香蕉奶，好好味喎，甜甜地，下次在香港見到可以再試過。在出發的途中，個領隊提到今天是母親節，所以每人送上一粒金莎，但那粒金莎淋淋地，我話一定係新年時食剩的。我亦立即send一個短訊給媽媽。之後到這間領隊不停讚好的巨龜莊食自助早餐，但我覺得味道一般，有很多食物都唔適合我，但仍有maggie好鍾意的饅頭，仲有好韓式又幾好味的紫菜湯麵！

11am 到達第一個水魚位──人參專賣廳，creamy話佢老公在這兒工作的，是個會計師來的。但點解佢話會計師會透過閉路電視望住我地呢？我覺得個sales勁似鄧景輝，連把聲都好似。個導遊紥左個道士髻，她更幫那三個小妹妹紥同一樣的髻，好壯觀，連個sales都話：「明天是佛誕，但今天是道祖誕嗎？」由於人參產品太貴，買唔起，得個企字，雖然話samsung買左保險，但你點知佢有冇混左雜質，真係有的話，唔通我專登搭飛機黎返呢度向samsung索償咩。
之後到第二個水魚區──韓流冬蟲夏草護肝寶專門店，勁奇怪的蟲草，勁似本菇，唔知想點，所以一點興趣也沒有。之後到韓國化妝品專門店，超平呀，laneige護膚套裝都只需₩33600，買一set試下先，有個團友仲買左四set呢，好誇張！

1.30pm 之後出發到青瓦台總統府門外參觀，除了與好識擺post好型的警察影相外，都唔覺有甚麼特別！個噴水池又唔靚。之後到旁邊的手信店見到一條好靚的四葉草香珠電話繩，所以第一時間買起它，買畀阿媽！阿媽收到都唔知幾開心，仲立即掛在手機上。

2.40pm 太過份了，居然到兩點半先去食午飯，食下午茶咩！餓到我差點無力再行。秘製燒烤豬肉，幾好味喎，加上我又勁肚餓，所以我真係食左好多，又試左用生生菜包住來食，更食左兩碗飯，又食左勁多辣椒醬，好好味，連泡菜都添左幾次，但美中不足的是我身後的風扇吹到我頭都痛埋，結果今餐只係食左八成飽咋！本來諗住食蜜瓜味雪條，但居然賣₩700，貴過便利店價錢，所以無食到。唯有忍下口，下次再食過，實有機會的。

4pm 到達收穫甚厚的明洞。先去食一支聲稱有32cm高的雪糕，勁可惡，我只想食純雲呢拿味，但佢居然收左我錢後先話無單味，只有雙味，仲要加₩500，即一支要₩1500，最可惡是那個杧果味實在太假了，根本唔好味，失望。之後就是我們瘋狂掃貨的時間，每到一間護膚品店，都有少量贈品派發。Etude House, TheFaceShop, Laneige, Skin Food, HUE Place…掃左爽膚水、洗面啫喱、多用途粉底、化妝綿，最開心的是，我在HUE Place買Laneige的多用途粉底時，買一支₩30000的野居然送我成袋贈品，好開心，超市僧。財散人安落，大部分韓幣都用哂，現在只餘下三四千won。由於花太多時間買護膚品，所以根本無時間行南大門，連南大門是甚樣的都不知道！但見到自己的戰利品，心情大靚！連團友都讚我們厲害呀，好開心！

6pm 到達手信街──仁寺洞，這兒感覺幾似赤柱。第一樣野先要做的，就是找洗手間，再在旁邊的郵筒影相。之後到一個小得很的商場──SSAMZIEGIL行左唔夠十分鐘，就覺得差不多時間，沿路折返，她們又掃了一些書簽。再到一間小食店買特色烤餅，人太多，唯有搭團友幫我們買，結果上映一幕雞同鴨講的場景，因為找錯錢的關係，所以經過一輪舌戰後，事情得以平息，但換來的只是一塊既唔好味又超甜的餅。

8pm 終於有得食晚餐，好肚餓，但今晚超豐富，好多野食！有八碟泡菜（連炒粉絲、魚蛋、還有一件好難食的物體）、蒸蛋、池魚、豬骨、一大鍋飯、硫磺鴨煲（是晚主角）。今晚泡菜好好味，除了魚蛋外，我們還食清了幾碟呢；蒸蛋好滑，幾乎掃清；池魚好味，太耐無食魚，結果兩條魚都畀我食哂；豬骨幾香，不過太大件，好麻煩，食一件已經好夠；但個鴨就真係無乜特別喎，平均一人食了一件而已，反而鍋內的菜卻全部掃清，因為難得有熟既菜呀，更吃埋隔離枱的菜！好豐富，好好味，無一枱係食得哂。原來今日係其中一個小妹妹的生日，全團人，甚至係全餐廳內的所有人，包括隔離團的香港人，都一齊唱生日歌，那個小妹妹一定好開心，好難忘啦，仲有蛋糕食添！不過係粟子蛋糕，我唯有食cream！但今晚真係好多野食，好full！上車時inez仲串左個肥仔低B添！

10pm 在酒店內為我的戰利品逐一拍照，攤在床上的感覺好滿足，哈哈哈！不過都唔夠maggie同vincci，她們把所有戰利品攤開，鋪滿全張床，好誇張。因為今晚是最後一晚，明天就要離開，所以今晚要執拾一切，亦係我表演pack 箱的時間，把所有東西統統放到行李箱內，無需另加hand carry，超開心！今晚是最後一晚在酒店內計數、寫行程、計計餘下金錢是否有錯、與inez傾傾偈，其實這幾天來，真係對她們四人加深了不少認識，其實都真是一個很好的體驗。今晚因為執野執得太耐，所以都幾夜先訓，十二點幾先關燈睡覺，當然每晚訓前都會做一做運動，幫助腸臟臑動！