9am 今天的集合時間改遲了15分鐘，因為給我們多一點時間可以執野。我們臨離開酒店時，在酒店房門口前影相。再見了，CO’OP Residence！再見了，417室！
9.40am 最後一餐在首爾食早餐，今餐話食中式早餐，但我完全唔覺得似中式，唯一似的是，廚師煮食時下多了油，碟碟都油光滿碟！因為在韓國食野，餐餐都唔係好油，反而仲好清淡，所以我話韓國人鍾意食泡菜係因為食物太淡，所以他們鍾意食濃味一點的泡菜啦。所以今餐真是麻麻地，炒粉絲、炒菜又太油，雞蛋又太咸，所以我都唔係食好多，不過就食左我在韓國的第一個饅頭，又真係幾好味喎，唔太硬。今日同枱的還有那對同鄉師奶，那個有錢師奶講了她的生平史，好勁呀，小時有三個工人，大時結婚後有兩個工人，從來未入廚，廚房內可能只有雪櫃是懂得用的，連洗衣機都唔識用。又講下佢人生既起起跌跌，當然佢有屋企的backup，梗夠膽去搏啦，我們這些小角色，都係平平淡淡地過活，夠食夠用就已經好滿足了！
11.30am 第三個水魚區──水晶城，個導遊話只要你夠磁場，未摸個大紫水晶時都已經會感到涼意，但我想講，個水晶旁有部冷氣機，唔需要磁場都覺凍啦！摸水晶時涼涼地，無乜感覺，但inez居然話唔涼，莫非真係有一點磁場？！不過場內的水晶飾物唔算太貴，一條白/粉紅水晶頸鍊都只需HK$60，紫晶就要HK$80，買黎玩下都算便宜。所以inez同maggie都買左一條。那個闊太居然花了千五元港紙買兩隻聲稱有磁場的杯？！太奢侈了！最好笑是那個領導阿ben，居然站站水魚位都幾乎有買野，好似想證明給我們看，那些貨品是正貨，是平貨。他今次又買左幾條鍊，幾誇張。
11am 到達新村梨花女子大學購物區，又係那句，時間太早，條街勁冷清！無乜野行，見到有檔₩1000一個窩夫加雪糕球，無食到，但後來團友都話超好味，有點後悔！算啦，窩夫又唔係甚麼新奇東西，香港都有的食物唔需要專登來首爾食。又到左一間名牌店evisu，那個阿ben又掃貨，但我無乜興趣，都係在門口影張相算吧，叫做到此一遊啦！
1pm 真不明呢個區怎可行到兩個鐘呢，我們在鄰近的megabox再行行，但真係唔太岩我們，我選擇了去洗手間，韓國的洗手間真好，大部分都有廁紙提供，而且空間頗大，衛生情況都可以接受，尤其是大型商場內的洗手間，更有些提供漱口水，可見韓國人是多麼的注重自己的儀容。之後有位太太給我一小塊烤魷魚乾，好好味喎，早知頭先去買埋餘下的won啦！
2.15pm 又一餐下午茶當午餐，餓到我肚都扁埋。今餐食地道春村韓式燒烤，即是炒雞，好好味，由於inez唔食辣，所以我要自己後加辣醬，由於我太肚餓，所以基本上是我包底。
3.15pm 到最後一個水魚區──土產店，這兒正是第一天來到首爾時食第一餐早餐時的地方，大家都話點解要到今天才來這兒，為什麼當初唔一次過黎埋？這兒產品偏貴喎，最想買的雞泡魚乾只可以一大包一大包咁買，結果我只是跟inez買四小包算吧！最好笑是同vincci兩個周圍逛逛，看看有甚麼可以剛好清哂所有won，但最後都是甚麼乜沒有買，因為無野想買！
5.30pm 排隊等寄倉，等左勁耐，終於把兩車行李寄上倉。之後同honey、ben、creamy影相，maggie仲同個肥仔影張相添！其實我都想同那個厭食baby影架，佢實在太深入我們的心，這幾天都nds不離手，餐餐都差不多要人餵佢，因為佢兩隻手都用緊黎打機！
8.00pm 回程機通常都會訓得到，但今次居然一點睡意也沒有，可能是興奮過度啦，回香港喎。今晚晚餐有牛同攪攪飯食，當然我揀左攪攪飯啦，最後一餐的韓國餐當然要食返些地道的，幾好味喎，個泡菜好味到我食哂不突止，仲要用埋泡菜的汁來撈飯，個海藻湯，勁味精湯，失敗之作。最開心是有雪糕食呀，個空姐一推著雪糕來，全場勁興奮，好開心，幾好味！
12.40pm inez急急與爸爸離開，我和maggie再與vincci say goodbye後就搭E41回大埔！
Subscribe to:
Post Comments (Atom)
No comments:
Post a Comment