8/5/2008 飛機上 --> 仁村國際機場 --> 早餐 --> 華克山莊豪華賭場 --> COEX購物城 --> 午餐 (石頭飯+韓式火鍋) --> 南山公園 --> 南山韓屋村 --> CO’OP酒店 --> 自費晚飯 --> 回酒店

0.30am大韓航空KE608正式起飛，大韓的空姐都有一個特色，就係有一個類似半個淺藍色蝴蝶結的頭飾，都幾靚女既。食左晚餐，但因為搭長途車一定會消耗好多能量，所以我都食左成盒飯！個泡菜幾好味喎，個雞就一般啦，個蔥油包就留返之後先食。食飽飯後，飯氣攻心，自然地就訓得著喇！訓左個幾鐘後，就到達首爾了！

5.02pm由呢一刻開始，就要把手上的手錶調較至韓國時間，準備開展這五天的行程。到達仁村國際機場，當地機場的時鐘簡約得黎又好精緻，好鍾意。拎埋行李後正式開始首爾五天團的行程。領導阿ben先介紹今團的導遊creamy，但當時的creamy勁cool，完全無出過聲，又黑黑地面，跟上次美麗華的寶哥時刻笑口滿面差太遠了。首站先到一間餐廳食早餐，韓國餐廳一般都以四人為一單位，所以座位都主要以四人檯為主。雖然只係一碗好韓式、好簡單的烏冬，只有幾塊豆腐卜及半隻雞蛋，但真係好好味。可能係搭完三個鐘飛程，體力都消耗得七七八八，所以覺得碗烏冬特別好味！開始見識到當地人所用的餐具都是以金屬為主，金屬造的湯匙，金屬造的扁扁筷子，連杯子都是以金屬所製的，起初都不是太習慣！韓國人一日三餐都會食泡菜，今餐也不例外，入鄉隨俗，點都要試一試當地的泡菜，果然同香港食到的完全不同。有傳統的津白及白蘿蔔，全部都帶點酸味，應該跟發酵過程有關。但始終未食得慣，所以都只係淺嚐幾口而已。

9.00am 真飽個肚之後就出發到第一個景點──Walkerhill華克山莊豪華賭場，一入到門口，那個坐在接待處的小姐一見到我就立即衝過來，用一口流利的普通話問我：「你今年多大？」有無搞錯呀，點解我都係擺脫唔到畀人問架，之前去馬會及澳門賭場都畀人問，今次又係咁，唉！我諗都無諗就答佢：「二十二！」=.= 在第一張買大小的枱旁看左好耐，再行左一圈，inez同maggie夾份買左₩30000泥碼，以換取一賭場紀念版鎖匙扣，最後，maggie取回₩5000，而inez就剩得一個匙扣！賭場真係唔適合我，我完全無興趣下注！之後出左去行下，再在門口影相留念，去到TheFaceShop見到好大個誠俊哥的紙版公仔，maggie立即衝埋去影相！

10.00am 下一站是COEX購物城，這個商場除了月一個水族館外，就毫無賣點，行左成個鐘都唔知有乜野睇？！之後又去到另一間TheFaceShop，見到誠俊哥的手印，今次我就影左張相！

12noon 團體午餐，石頭飯加韓式火鍋。到了這兒，導遊再介紹今團的另一位工作人員，那是由韓國觀光局派出的攝影師honey，矇眼厚嘴唇，好典型的韓國男人樣！今餐有六款泡菜，其中有一款真係好好味，檯檯都差不多添左幾次，這碟就是勁似豆乾的魚片，可能係因為好合香港人的口味，所以食落覺得好好味；石鍋真係好熱，幾好味，所以我食得哂成個石頭飯；個火鍋呢，無乜特別，好普通，同平日既打邊爐無乜分別，所以我們都食剩不少，唯一特別的可能就係鍋上的豬肉，不其然令人聯想到香港人打邊爐必備的肥牛，人地就粉絲扮魚翅，他們就肥豬肉扮肥牛。由於同團有三十人，有兩個人要自成一檯，結果他們(Soso同KaFung)就食剩勁多呢。食左差不多成個半鐘，之後在鄰近的一間舖頭內，遇到一頭大狗大吠，嚇死！

1.45pm 到達下一站──南山公園，呢個景點差不多所有首爾團都必到的，但我完全唔覺有甚麼特別，我反而覺得大埔海濱公園更靚。或者這兒唯一的賣點就是，「我係金三珣」曾經在這兒的一條樓梯取景，我們亦順應一下影左幾張gag相，不過我太累了，所以影得超頹！由於我們無得去「天國的階梯」的樂天世界，影唔到泰華的壁畫，唯有在這兒的「三珣的階梯之旁邊的壁畫」拍照留念。之後因為時間太多，所以我們做埋哂啲無聊野，玩跳起，玩扮流浪漢，maggie果然有演藝細胞，扮backpacker扮得出神入化！

2.40pm 到鄰近的南山韓屋村，其實這兒只有一間屋供大家參觀，當作見識了以前韓國人的生活面貌咁啦，又睇左大長今之後放置泡菜的地方。見到一個穿起傳統韓服的小妹妹，超可愛，所以偷拍左佢；之後個領隊見到我們四個，居然叫我扮爬牆，滴哂汗囉，大人大姐，居然要我們扮爬牆，佢唔係以為我地係gag友嘛？！

4pm 話咁快就完成了今日的所有行程，從來未試過四點就完哂一日行程！回到我們這五天的家──CO’OP Residence，間酒店都幾靚，麻雀雖小，五臟俱全，連廚房用品都有，唯一美中不足的都算是個廁所，廁所門無鎖、洗手盆太矮、花灑頭與馬筒太接近。Maggie同vincci就把握時間眠一眠，我同inez就勁無聊地玩啤牌，幾乎把所有啤牌遊戲都玩過了。

6pm 休息過後，我們四人就出去覓食，行左頗耐終於搵到一間餐廳係有圖有價錢，入到去先知全間餐廳得兩種食物，只有泡飯及韓式煎餅。這間餐廳另一特色就係要坐起度食，坐到我腳痺，食得勁唔舒服！但食物味道不錯，老闆娘又好好人！最重要係每人只需₩3500，平！食飽過後，行左陣街，去到一間叫紫菜記念品的舖頭買左一盒人參茶，買唔起人參就買這個個頂著先啦；再在一間便利店買左支粟米水。Vincci買左筒餅，味道有點似涼茶，又有點似龜苓膏，又有點似蜜糖，幾特別。之後就返酒店，梳洗過後就過maggie房玩左陣uno同教佢玩鋤大弟，而電視正播著TVB Korea，播著「法證先峰」。十一點幾左右返去睡覺。