9/5/2008 自助早餐 --> 東大門市場 --> 自費午餐 --> EVERLAND夢幻樂園 --> 猴子歡樂谷 --> 回酒店

8.45am 八時接過morning call，就起床梳洗。八點九到酒店大堂集合，先出發食自助早餐，有粥、豆漿、饅頭……幾豐富！炒粉絲最受歡迎，好快掃清，不過那些餃子很硬，要靠那些咖喱汁調味。

10.00am 十點左右到東大門市場，旺角十點都無人行啦，咁早就帶我們到這兒？大部分舖頭都無人看舖！到處看看，嘩嘩嘩！點解韓國人的衣服咁細件架？件件都好似童裝咁，超窄，無廿吋腰都唔駛旨意可以穿得起！但佢地又真係穿得起。仲有呀，那兒的女裝鞋大部分都標榜高跟，最高可以去到13cm，變態架，企都企唔到啦！無野岩睇就唯有影下韓國的女仔啦，個個個樣都係一樣架，全部都係同一個style，齊陰冬菇頭、單眼皮、眼咪咪、同一高度、無帶眼鏡。之後又試左少少街頭小食，年糕串、炸蟹柳卷、玉桂超甜烤硬餅。個年餻本身無味，但個醬就好韓式，甜得黎又有點辣，味道麻麻，食完唔會想再食；蟹柳本身點煮都係咁既味，呢個炸蟹柳卷就係蟹柳味，ok啦；個玉桂超甜烤硬餅，真係好甜，食過一定唔會想再食，更唔會推薦畀人食，個老闆笑我地四個先買一個，我想講，買一個已經好難得啦，都唔好味既！集合走人。

2pm 當大部分團友被「騙」了去食超貴價自助餐時，我們四人另加soso、kafung、沙太，一行七人到附近的餐廳食午餐。行左一陣，買左八個餐包準備在樂園醫肚。終於決定到一間外形頗日式的餐廳食。點左五碟食物大家一齊share食，有咖喱豬排飯、炒年糕加辛辣麵、涼拌撈麵、烏冬、壽司，一人都只係₩2600左右，超抵！那些泡菜一般啦，唔太好，又唔太差；個咖喱好好味、好香，薄薄的豬排炸得好鬆化，伴碟的粟米好甜；炒年糕辣辣地，好韓式、好好味，辛辣麵好正，但唔食辣的inez就話太辣了；涼拌撈麵，辣辣地，幾好味；烏冬，好傳統的韓式烏冬，好似每一間的烏冬無論湯底或材料都好由同一個廚師煮的一樣；壽司，味道不錯，但無乜驚喜！食完之後就行返去他們食自助餐的地方，目的是去洗手間，但居然給我們發現，原來個領隊吹到天花龍鳳的頂級海鮮自助餐，只係值₩18000，但他們卻收我們₩35000，抽水都唔係咁抽法呱，成倍有多，而且聽返團友講，那些長腳蟹比我們平日食的蟹更要難食，食物種類少，質素差，魚生極細件，甜品種類少而普通，唯一可以讚的只是壽司種類多。我們真係勁開心無參與這個自助餐，而自行去食一餐大家都好滿意的豐富午餐。當然要在那個價錢牌前影幅相留念！

4.30pm 太過分了，為了就那個自助餐，居然要我們成五點鐘左右先到達everland夢幻樂園，試問一個比香港迪士尼更大的樂園，怎可能在幾小時內行得完、玩得完呢？人太多，我們先到動物園逛逛，其實我本人對那些動物不甚興趣。看獅虎前，買了筒爆谷來消磨時間，看完獅虎後，我們在一間手信店見到好多雪豆公仔，好得意呀，所以我狂影好多相，好開心呀！我們在這短短的幾小時內只是去了看超動感影院，幾好看呀，雖然唔知佢講乜，但單看3D效果已經好好看，我還偷偷地除一除3D眼鏡看，又真係少了立體感！看完一大輪動物同動感影院，之後就匆匆忙忙地食過晚餐，買了一個小飯團，都幾好味。有一點不得不提，當maggie買雪糕、我買飯團時，那些樂園職員手腳奇慢，慢到令人滴哂汗，若果他們在香港工作，一定好快被人炒魷魚！後來還看了巡遊表演。之後到了歐洲村看鬱金香，不過如果早一點來看，一定更美，遍地花海，好吸引呀！準備下山，問人路時，又發揮我們指手畫腳的手語，那個職員都覺得好搞笑！在下山途中，本來諗住玩旋轉木馬，因為覺得今日真係乜都無玩，但時間有限，最後都無玩到，可惜。之後唯有行手信店，又見到那些好可愛的雪豆公仔，仲有那些好靚的電話繩，真係有點想據為己有，不過電話繩又真係無乜用，都係用來做手信好。正式下山，到達上車地點。夠鐘集合，原來還有煙花表演架，好靚呀，everland又真係幾抄迪士尼喎！可惜唔夠時間，玩唔到甚麼！

10.00pm 我們回酒店，今晚電視播「爭霸」。因為太累了，匆匆洗過臉、洗過頭、沖過涼、洗過衫、吹埋頭、晾埋衫，就睡覺了。